English

Saplae Jein

Taem oganaesesen blong yu i gro mo stat blong kamap wetem fulap kastoma, ol saplaea mo ol patna, yu kam wan link long wan long olgeta mo komplesk saplae jen. Blong kam wan saplaea we oli trastem yu o kastoma naoia, hem i no blong deliverem ol gudfala prodak nomo o ol sevis, be hem i blong provaedem kastoma kea we gud olgeta mo mekem ol peimen long taem. Ol wei blong kontaktem ol bisnes tede i min se yu mas obsevem ol gudfala praktis (long plante keis, long saed blong komplians) taem i kam long saeba mo infomesen sekuriti from ol wiknes bae oli putum oganaesen blong yu long risk ….. be tu long ol narafala we oli stap antap mo daon long saplae jen.

Ol risk

  • Taem kastoma/klaen, saplaea mo patna data oli stap long ol defren databes we oli spredaot, mekem se wan wiknes i save mekem se kwaliti blong ful jen ya i save open long ol problem. 
  • Ol man oli save serem data wetem mo link long jen, eksampol tru long imel o ol singol poin blong aksesem onlaen potol.  
  • Evri taem wan niufala oganasesen i joinem saplae jen ya, risk blong sekuriti brij i stap kam bigwan moa.  
  • Sefti blong faenans, sefti blong wokman, intelekjel propeti, data komplaens, ol faenans mo nem blong bisnes oli stap evriwan long risk, blong evri oganasesen long jen ia.   

Winim ol stret standed long saplae jen

From ol tingting ia, hem i impoten se evri oganasen long saplae jen oli gat ol sekua sistem mo ol praktis, oli save soem hem ia i go long ol nara wan long jen ia, mo tu gat konfidens long ol nara wan long jen.  

I save hapen se evri oganasen long jen ia bae gat ol difren strakja, ol bisnes model, ol wok pratis, infomesen infrastrakja mo maet oli kam long ol difren saes … mo bae oli wok long ol difren standed long saed blong saeba mo infomesen sekuriti blong olgeta, mo hao oli jajem blong ol nara wan – wetem blong oganasen blong yu.  

Blong stat, hem i stret wok blong yu olsem wan kastoma o wan man we i stap saplae blong mekem sua se yu yusum ol gudfala level blong sekuriti lo saed blong teknoloji mo ol rul blong hem, ol aksen plan mo praktis mo fasin blong ol wokman.  

Yu sud putum tu long eli taem we yu stap go insaed long wan saplae jen, bodi, kwaliti mo level blong sekuriti we yu nidim (sapos i gat eni wan), mo agri o toktok blong faenem wan ansa we i stret folem wanem yu nidim mo ol level blong kwaliti blong sevis blong yu, mo olgeta blong ol patna blong yu long jen ia.  Ol bigfala patna oli save gat ol strong rul lo saed blong wanem oli wantem, be hemia bae i save defren folem saes mo wanem kaen oganasesen we hem i blong yu mo wok blong hem long jen ia.  

Yu maet save winim wan stret standed – mo jekem gud olgeta blong ol patna blong yu long saplae jen ia – insaed long oganasesen blong yu o wetem help blong wan konsalten we i wok aotsaed long oganasesen blong yu.  Ol advaes we mifala i givimaot long saet ia hem i kam blong helpem yu wokemaot ol eria we i nid blong yu lukluk gud long hem, mo givimaot infomesen mo advaes i go stret long ol eria ia.