English

Ol Paswod

Ol paswod blong yu hemi moa nomol wei blong pruvum aedentiti blong yu yusum ol websaet, ol imel akaon mo kompiuta blong yu hem wan (tru long ol Yusa Akaon). Mekem se yus blong ol paswod i impoten blong mekem se i protektem sekuriti mo aedentiti blong yu. Bes sekuriti long wol i nogat yus long hem sapos wan man we i save spolem ol man i garem wan tru yusa nem mo paswod.

I nomol blong yusum ol paswod tugeta wetem yusa nem blong yu. Be, long ol sekua saet oli save yusum tu wetem ol nara metod blong aedentifikesen olsem wan separet PIN mo/o ol infomesen we ol man i gat ol memori long hem. Long sam kes bae oli askem yu blong givim nomo sam karekta blong paswod blong yu, from adisenol sekuriti.

Risk blong yusum ol wik paswod

  • Ol man oli save giaman yusum nem blong yu blong mekem frod mo ol nara kraem, inkludum:
    • Aksesem bank akaon blong yu
    • Pem ol aetem onlaen wetem mani blong yu
    • Giaman yusum nem blong yu long sosel netwoking mo ol deiting saet.
    • Sendem ol imel long nem blong yu.
    • Aksesem praevet infomesen we i stap long kompuita blong yu.

Jusum ol bes paswod

Mekem:

  • Oltaem yusum wan paswod.
  • Blong mekem wan strong paswod, hem i simpol nomo blong yu jusum tri eni kaen toktok. Ol namba, ol saen mo kombaenem tugeta ol kapitol mo smol leta we yu save yusum sapos yu nid blong mekem wan strong moa paswod, o akaon we yu jes mekem wan paswod blong hem i no nidim ol leta nomo be ol nara karekta tu.
  • I gat ol nara wei, we oli no nidim ol rul we yu mas folem, be yu save tingting gud long ol tingting ia:
    • Jusum wan paswod we i save gat eit karekta (o bitim eit sapos yu save, from i had blong ol kriminol oli save ges o brekem ol longfala paswod), kombaenem tugeta ol kapitol leta mo ol smol leta, ol namba mo ol kibod saen olsem @ # $ % ^ & * ( ) _ +. (eksampol SPA3DAm@n – wan difren wei blong talem spaedaman, yusum ol leta, ol namba, ol kapitol mo ol smol leta). Be, lukaot se sam pangjuesen mak oli had blong save taepem olgeta long ol foren kibod. Mo tu tingbaot se blong jensim ol leta oli go long ol namba (eksampol E go long 3 mo i go long 1) hem i ol teknik we ol kriminol oli save gud long hem.
    • Wan laen blong wan singsing we ol nara man bae oli no save tingse bae yu save yusum.
    • Famli nem blong mama blong wan nara man (i no famli nem blong mama blong yu).
    • Jusum wan toktok we yu save long hem, eksampol ‘Wokbaot strong olsem yumi, bebi yumi bon blong ron’ mo tekem fes karekta blong ol toktok ia blong garem ‘wsoy, bybbr’

No mekem:

  • Yusum ol paswod olsem olgeta ia:
    • Yusanem blong yu, stret nem o bisnes nem.
    • Nem blong ol famli memba o nem blong ol animol we yu stap lukaotem.
    • Befdei blong yu o befdei blong wan famli blong yu.
    • Fevoret futbol o F1 tim o ol nara toktok we i isi blong wokemaot wetem smol bakgraon save.
    • Toktok ia ‘paswod’.
    • Numerikol sikwens.
    • Wan nomol toktok lobg diksenari, we ol nomol haking program oli save krakem.
    • Taem yu stap jusum ol paskod mo ol PIN we oli gat namba long hem, no yusum ol namba we yu kaon i go antap o kaon i go daon (eksampol 4321 o 12345), ol semak namba (olsem 1111) o ol paten blong ol namba we oli stap long ol kipad (olsem 14789 o 2580).

Lukaotem gud ol paswod blong yu

  • Neva talemaot ol paswod blong yu long ol nara man. Sapos yu tingse wan nara man i save paswod blong yu, jenisim kwiktaem.
  • No taepem paswod blong yu we ol nara man oli save luk wanem yu stap taepem.
  • Blong yu stap jensim ol paswod blong yu oltaem i no stret, be i stret blong jensim nomo sapos wan man i hakem, mo long kes ia oli mas jenis kwiktaem. Mekem semak sapos wan man i hakem ol nara akaon o websaet we yu stap yusum ol semak login ditel long olgeta.
  • Yusum wan defren paswod blong evri websaet. Sapos yu gat wan paswod nomo, wan kriminol i mas brekem nomo blong save gat akses long evrisamting.
  • No yusum ol semak paswod we yu bin yusum finis (eksampol paswod2, paswod3).
  • Sapos yu mas raetem daon ol paswod blong yu save tingbaot olgeta, jensim olgeta go long wan kod we yu nomo yu save mo mekem se bae ol narawan oli no save ridim o andastandem.
  • Wan nara wei blong raetem daon ol paswod hem i blong yusum wan onlaen volt o sef. Lukaot ol advaes, mo mekem sua se wan we yu jusum hem i sekua mo ol man oli trastem.
  • No sendem paswod blong yu tru long imel. I nogat wan fem we ol man oli trastem we oli save askem yu blong mekem olsem.

Long saed we yu sud yusum ol defren paswod blong wanwan akaon blong yu i save mekem se hem i had blong tingbaot olgeta. Tingting gud blong yusum wan aot long fulap paswod volt we oli stap long intanet, be ridim ol riviu mo garem ol advaes.

Ol paswod volt/sef

I gat wan namba blong ol paswod volt (o oli talem long wan nara wei tu se ol paswod sef o ating wan nara tem) we oli stap blong yu yusum – sam we yu mas pem, mo sam oli fri. Oli mekem se yu save storem evri paswod blong yu long wan, isi-blong-yu-aksesem ples mekem se yu no nid blong tingbaot olgeta evriwan, o raetem olgeta daon. Yu nidim blong tingbaot nomo wan set blong ol login ditel.

Yu sud ridim ol riviu o garem ol pesenol advaes bifo yu stap putum paswod blong yu go long wan paswod volt. Wanem we yu jusum, rekomendesen we miflala i talem, hem i yu jusum tufala fakta we hem i soem wan proses (2FA) – Long narafala toktok, hem i sendem wan kod i go long mobael fon o narafala divaes we yu yusum blong entarem i go long paswod volt blong yu save gat akses semak olsem we yu konfemem long wan onlaen peimen long bank.

Blong save gat moa sekuriti, mifala i rekomendem se yu gat ol kod blong ol paswod long sam wei taem yu entarem olgeta i go insaed long volt, nating we mifla i lukluk save ol wei ya blong averej yusa i yusem, be hem i no praktikol oltaem.

KONTROLEM OL YUSA AKAON

Everi man we oli gat wan kompiuta oli sud save yusa akaon blong olgeta blong save gat akses i go long ol fael mo prokram blong olgeta. Evri yusa akaon oli sud gat akses i go long yusa nem mo paswod blong olgeta taem oli entarem blong save gat sefgad yusa praivasi. Ol narafala yusa akaon fija oli save setemap insaed long yusa akaon-inkludum ol perental kontrol.(ol windo vista mo windo 7 nmo)

No mas yusum wan akaon we i gat administraita privilij long evridei yus, from malwe i save tekemap ol administraita raet. Sapos yu stap yusum yusa ia yu wan, setemap wan administraita akaon blong yu save yusum taem yu wantem mekem ol wok ia olsem instalem ol prokram, jensem ol konfigaresen sistem mo ol narafala ‘standet yusa’ akaon olsem nomol akaon blong yu. Sapos yu no save lok in olsem administraita, bambai yu mas entarem wan administraita paswod taem yu stap instolem wan niu divais draeva or prokram. Yu save manejem yusa akaon blong yu insaed long windo kontol panel.

Lukaotem paswod from Stap sef onlaen on Vimeo.

Glosari

Wan Glosari blong ol tem we oli yusum long atikol ia:

Yusanem

Wan kod nem we i go wetem paswod mo anlokem wan yusa akaon.

PIN

Personal Indentification Number.