Wan haktivis (haking aktivis) hem i wan man we i gat ol strong biliv long wan samting mo hem tu i gat teknikol save long hao blong atakem wan websaet o kampani agensem wan nara man we hem i gat ol biliv we i no semak olsem ol biliv blong hem. Hem i save tekem fom blong wan dinael blong sevis (DoS) o distributed dinael blong sevis (DDoS) atak blong spolem trafik we i go long wan o fulap moa websaet, o wan mesej we yu save luk i kamaot gud long websaet hom pej, blong talem ol tingting we oli no agri long hem.
Hae-trafik, ol impoten websaet mo ol sosel netwoking fid blong ol bigfala koporet o gavman dipatmen oli save gat moa ifek blong haktivisim, be i nogat wan oganasesen we hem i strong blong no kasem eni atak. ‘Anonimes’ hem i bigfala profael intanasenol grup blong ol haktivis long ol yia we oli pas.
Ol risk
- Sevis blong websaet blong yu i no go gud.
- Lus blong reveniu, bisnis nem blong yu i go nogud o tugeta.
- Ol wok blong oganasen blong yu – o ol man we oli stap wok long hem – oli talemaot olgeta lo wan negatif wei, we fulap i no save from wanem.
Protektem websaet blong yu
Sapos yu stap hostem websaet blong yu wan be yu no yusum wan narafala kampani aotsaed long kampani blong yu blo hostem websaet blong yu, mekem sua se hadwea mo sofwea hem i sekua:
- Yusum strong paswod we i gat proteksen, long sistem ia. No livim eni paswod i set long defol valiu blong hem.
- Mekem sua se seva i gat proteksen we i kam long wan gudfala faeawol mo intanet sekuriti sofwe.
- Wokem jekem gud ol log fael blong kasem eni man we i wantem stap gat akses lo hem.
- Yusum letes vesen blong eni iComes sofwe. Ol olfala vesen i save gat ol wiknes we ol haka i save yusum.
- No mas storem praivet infomesen blong ol kastoma mo ol ditel blong kredit kad long wan pablik iComes seva.
- Protektem ol ditel blong SSL blong yu mo kipim olgeta i sikret.
- Sapos yu tingse websaet blong yu i save kasem wan DoS o DDoS atak, lukaotem mo tokbaot wetem wan DDoS proteksen speselis we hem i gat stret save mo ol tul blong protektem bisnes blong yu.
- Tingbaot blong yusum wan profesenol penetresen fem blong testem ol sekuriti we i stap long iComes seva blong yu.
Sapos yu yusum wan nara kampani aotsaed long kampani blong yu blong i host:
- Mekem wan reviu long sekuriti blong hem mo aveilebiliti polisi mo ol arenjmen.
- Jekem se sevis level agrimen ia i stret long ol nid blong yu.
Tingbaot blong yusum wan profesenol penetresen fem blong testem ol sekuriti we i stap long seva blong kampani we i host blong yu.